Dechreuodd taith artistig Anna Rowlands drwy astudio celf ar lefelau ‘O’ ac ‘A’ yn Ysgol Uwchradd Tyddewi, ac yna cwrs sylfaen yng Ngholeg Celf a Dylunio Sir Gaerfyrddin. Ym mis Hydref eleni, bydd yn arddangos ei gwaith celf yn Oriel Joanna Field yn Theatr Torch, mewn arddangosfa o’r enw ‘Playful Exploration’.

Dywedodd Anna: “Ar ôl y coleg, dechreuais weithio ac yna cefais dri o blant, felly ychydig o amser oedd ar ôl ar gyfer celf. Wrth i’m plant ddod yn lled-annibynnol, sylweddolais fod gen i ragor o amser i mi fy hun, a gwyddwn ei bod hi’n bryd dychwelyd at fy ochr greadigol. Yn 2010, ymunais â Grŵp Celf Tyddewi a Solfach, ac yn ystod y cyfnod hwnnw y cafodd fy angerdd am beintio ei adnewyddu.”

Dros y 15 mlynedd ganlynol, datblygodd Anna arddull ffantastig a mympwyol, gan greu tirweddau dychmygol yn llawn tylwyth teg, dreigiau a chreaduriaid y goedwig gan ddefnyddio brwshys bach iawn.

“Y llynedd, roeddwn i’n teimlo’n barod am newid. Roeddwn i am roi’r gorau i geisio rheoli popeth, llacio fy afael ac ailddarganfod yr elfen o chwarae. Arweiniodd hyn fi at waith lled-haniaethol ac agwedd fwy arbrofol. Mae ‘Playful Exploration’ yn adlewyrchu’r newid hwn. Mae’n ymwneud ag ymddiried yn fy ngreddf, cofleidio ansicrwydd a dod o hyd i lawenydd yn y ffaith nad wyf yn gwybod yn union beth fydd yn digwydd nesaf,” meddai Anna.

Mae ei phaentiadau wedi canolbwyntio'n ddiweddar ar flodau, llestri a physgod – ffurfiau sy'n teimlo'n gyfarwydd, ac eto'n gadael lle i chwarae, dehongli a darganfod. Mae ei phroses yn dechrau heb gynllun, fel yr eglura Anna:

“Rwy’n dechrau gyda gwneud marciau’n ddi-bryder gan ddefnyddio pensiliau lliw a chreonau cwyr, gan adael i reddf arwain yn hytrach na bwriad. Dros hyn, rwy’n rhoi haenau o acrylig, gan weithio gyda brwsys mawr ac amrywiaeth o offer. Yna rwy’n crafu/tywodio’n ôl i ddatgelu haenau a marciau oddi tano. Ar y cam hwn rwy’n ceisio peidio â meddwl gormod. Caniateir i’r paentiad ddatblygu ar ei delerau ei hun. Mae delwedd yn dechrau ymddangos yn raddol ac unwaith y bydd yn gwneud hynny, rwy’n ymateb iddi. Trwy baentio negyddol, cysgodi ac ychydig o fanylion, mae’r ddelwedd yn dod yn fyw.

“Mae’r cam olaf yn araf ac yn fyfyriol. Treulir llawer o’r amser yn edrych ac yn teimlo fy ffordd drwy’r paentiad. Yma y caf y boddhad mwyaf – yn y ddeialog dawel rhyngof fi a’r gwaith. Gobeithiaf y bydd y gwylwyr yn mwynhau edrych yn unig, ac y bydd pob ymweliad newydd yn datgelu rhywbeth newydd.”

Dilynwch Anna ar Instagram: @annarowlandsart / Facebook: Anna Rowlands Art

Gellir gweld Playful Exploration gan Anna Rowlands yn Oriel Joanna Field, Theatr Torch, yn ystod oriau agor y Swyddfa Docynnau trwy gydol mis Hydref. Ffoniwch y Swyddfa Docynnau ar 01646 695267 neu ewch i torchtheatre.co.uk am ragor o wybodaeth.