Gallai cynhyrchiad Ieuenctid Haf Theatr Torch Robin Hood- The Legend of the Black Knight fod yn eich tro olaf i weld nifer o aelodau Theatr Ieuenctid yn perfformio fel rhan o'r cwmni ifanc ... I nifer o'r criw creadigol, bydd troi'n 18 oed yn eu gweld yn mynd i'r brifysgol neu'r coleg, ac ar ôl cael eu hysbrydoli gan eu rolau actio yn y Torch, bydd llawer yn dilyn gyrfa yn y theatr ac actio.

Fel aelodau o Theatr Ieuenctid y Torch, bydd cynulleidfaoedd eisoes wedi gweld Callie-May, Neo, Dan, Zane a Caitlyn yn nramâu NT Connections Replica, Ravers a Sycamore Gap. Yn ogystal â The Bangers and Chips Explosion a Wind in the Willows dan lygad craff Tim Howe, Uwch Reolwr Ieuenctid a Chymuned yn y Torch, a fydd yn drist o’u gweld yn gadael.

Dywedodd: “Rydym yn hynod falch o’r hyn y mae’r unigolion ifanc hyn wedi’i gyflawni. Maent wedi blodeuo’n oedolion rhyfeddol, yn barod i ymgymryd â cham nesaf eu taith y tu hwnt i’n hystafell ymarfer. Maent yn unigolion hyderus, uchelgeisiol a chreadigol, ac nid oes gennym unrhyw amheuaeth y byddant yn llwyddo lle bynnag y mae eu llwybrau’n arwain.”

Bydd Callie-May, 18 oed, a chwaraeodd The Chief Weasel yn 2024 Wind in the Willows, yn dychwelyd fel y Frenhines Eleanor yn Robin Hood – The Legend of the Black Knight fis Gorffennaf. Mae hi wedi cymhwyso fel triniwr gwallt lefel 3 yn ddiweddar ond mae'n gobeithio gweithio o fewn y theatr a ffilm yn gwneud gwallt a cholur.

“Bydd y cyfeillgarwch a’r cysylltiadau sydd gen i gyda’r grŵp yn rhywbeth y byddaf yn edrych yn ôl arno am byth. Mae wedi dangos fy nghariad at ddylunio a chreu yn bendant ac o fewn y flwyddyn ddiwethaf fy mod am ddilyn gyrfa ym myd theatr. Mae Tim wedi bod yn ddylanwad mawr yn sicr ar fy ngyrfa a llwybr bywyd. Mae wedi fy helpu i ddod o hyd i lwybr fy mreuddwydion,” meddai Callie-May.

Bydd Neo, 17 oed, yn mynd i'r brifysgol i astudio Gwyddoniaeth Fforensig ond mae'n dweud bod Ieuenctid y Torch wedi rhoi llawer o atgofion iddo a bydd y cyfnod hwnnw'n parhau i fod yn rhan mawr iawn o'i fywyd.

“Rhaid bod mynd i Aberystwyth i gymryd rhan yn rhaglen NT Connections yn un o’r profiadau gorau. Rwyf am barhau i wneud drama gan fod Theatr Ieuenctid y Torch yn teimlo fel teulu – mae’n gynhwysol, yn hwyl, yn caniatau i mi fod yn rhydd, yn hapus ac mae’n ddiddorol,” meddai Neo a fydd yn chwarae’r prif gymeriad, Robin Hood.

Mae Caitlyn yn gobeithio astudio drama yn y coleg, yna mynd i Theatr Caerdydd yn y pen draw i weithio ym myd teledu.

“Rwy’n cael ymdeimlad gwirioneddol o lawenydd o berfformio felly rwy’n gwybod fy mod am barhau ag ef a cheisio gwneud gyrfa fel actores. Rwy’n hoffi’r elfen gymdeithasol ohono yn fawr iawn, a chwrdd â phobl newydd,” eglurodd Caitlyn.

Bydd aelod arall o Theatr Ieuenctid y Torch yn mynd i'r Royal Birmingham Conservatoire i astudio Theatr Gymhwysol. Mae Zane, sy'n chwarae rhan Friar Tuck ac a chwaraeodd Mrs Gunge yn The Bangers and Chips Explosion, wedi cael amser gwych yn y Torch.

“Uchafbwynt a chof penodol o’r sioe oedd cael chwarae rhan Mrs Gunge, y brif wraig ginio grotesg, sy’n casáu plant. Yn ystod Carnifal Aberdaugleddau, cefais gymryd rhan ar fflôt Theatr Torch, wedi gwisgo fel Mrs Gunge a defnyddio holltwr cig,” meddai Zane.

Ychwanegodd: “Pe na awn i wedi mynd i Theatr Ieuenctid y Torch, mae’n debyg na fyddwn i hyd yn oed wedi ystyried gyrfa o fewn y celfyddydau. Y cyfle i berfformio yn un o’r unig theatrau cynhyrchu yn Sir Benfro ac un o’r ychydig yng Nghymru. Felly, mae’r cyfle i berfformio yn y prif dŷ yn brofiad gwych.

Bydd Dan yn chwarae rhan Little John. Chwaraeodd hefyd Toad a Hairy Harry ac ar hyn o bryd mae’n cael clyweliad ar gyfer rhai o ysgolion drama blaenllaw’r wlad.

“Mae bod yn aelod o Theatr Ieuenctid y Torch wedi ysbrydoli fy ngyrfa; mae wedi fy annog i ddilyn actio oherwydd gallwn weld fy sgiliau’n gwella,” meddai Dan sy’n dweud bod Robin Hood yn berfformiad na ddylid ei golli.

Ychwanegodd Dan: “Mae wedi’i ysgrifennu gan Tim a ysgrifennodd The Bangers and Chips Explosion a oedd yn gynhyrchiad anhygoel. Mae gennym ni lawer o brofiad yn y sioeau hyn nawr felly rydyn ni'n gwybod y bydd y sioe y gorau y gall bod.”

“Mae’n mynd i fod yn gyfres o sioeau emosiynol iawn – cyfres o sioeau olaf i’r aelodau hyn o’n cast. Mae rhai o’r bobl ifanc hyn wedi bod gyda’r Torch ers amser maith. Ond am gyfres anhygoel o atgofion rydyn ni’n eu creu iddyn nhw, a’r cyfeillgarwch maen nhw’n ei ffurfio yma fydd rhai rydyn ni’n gwybod fydd ganddyn nhw am oes – yn union fel criw Robin Hood” meddai Tim i gloi.

Gellir gweld y criw gwych hwn o bobl ifanc brwdfrydig yn Robin Hood: Legend of the Black Knight (gyda chefnogaeth Porthladd Aberdaugleddau ac Ymddiriedolaeth Elusennol Ingles) ar lwyfan Theatr y Torch ddydd Llun 20 Gorffennaf, dydd Mawrth 21 Gorffennaf a dydd Mercher 22 Gorffennaf am 6.30pm. Pris: £10 / £8 consesiynau. Archebwch docynnau trwy'r wefan torchtheatre.co.uk / Swyddfa Docynnau: 01646 695267.