James Williams - Yn Swyno'r Glust

Mae’r cyfansoddwr, awdur a chyfarwyddwr o Sir Benfro, James Williams, wedi gweithio ar bob sioe Nadoligaidd yn Theatr Torch am y 25 mlynedd diwethaf. Ei sioe gyntaf yn y Torch yn Aberdaugleddau oedd Christmas Cat and the Pudding Pirates nôl ym 1998 ac ers hynny mae James wedi bod yn ddigon ffodus i weithio gyda sawl cyfarwyddwr artistig ac actor ar hyd y daith.

Y Nadolig hwn, mae James, Cyfarwyddwr Cyswllt y Torch, wedi cyfansoddi cerddoriaeth ar gyfer pantomeim Nadoligaidd Theatr Torch, Jack and the Beanstalk yn ogystal â Little Red Riding Hood ar gyfer Theatr y Sherman, wedi ysgrifennu A Christmas Wish for Simply Theatre, Geneva ac wedi ysgrifennu a chyfarwyddo Snow White and the Seven Elves ar gyfer Bluestone Wales.

“Mae cyfansoddi ar gyfer Theatr Torch eleni wedi bod yn bleser pur, gyda llawer o wiriondeb. Mae'r sgript jest yn ffantastig, ac mae'r caneuon yn fachog, yn llawn ymadroddion gwych a fydd yn aros yn eich pen. Mae gennym ni gantorion anhygoel, ac mae'r gerddoriaeth yn taro nodyn, yn heriol, yn popio ac yn llawer o hwyl gyda chyfranogiad y gynulleidfa lle bydd pobl yn teimlo'n rhan o'r perfformiad. Mae’r ‘gân pump y dydd’ yn bendant yn un y byddwch chi’n ei chofio,” chwarddodd James.

Ond wedi cyfansoddi ar gyfer cymaint o bantomeimiau Nadoligaidd yma yn Sir Benfro, o ble y caiff James ei ysbrydoliaeth?

“Mae’r cyfan yn dechrau gyda’r sgript, a dw i’n gwneud yn siŵr bod y caneuon yn berthnasol i’r symudiadau ar y llwyfan. Rwy'n ceisio dychmygu sut brofiad fyddai bod yn y byd hwnnw ac os gallaf gael y cymeriad yn glir yn fy mhen, daw'r cyfan yn hawdd. Y geiriau sy’n anoddach i mi a gall fod yn dipyn o her,” esboniodd James a symudodd i ardal Caeriw o Gaerdydd ychydig cyn y cyfnod clo.

Dros y blynyddoedd, mae James wedi gweithio i sawl cwmni arall gan gynnwys NTW, WNO, Hijinx, Triongl, Give It A Name a Theatre Royal Plymouth. Ef yw cyfansoddwr y sioe gerdd The Jolly Folly o Polly the Scottish Trolley Dolly a The Sheep Chronicles mewn cydweithrediad â’r dramodydd Lesley Ross. Ef yw cyfarwyddwr y sioe syrcas gwobrwyedig Flown for Pirates of the Carabina ac mae wedi cyfarwyddo Arddangosfa MAMT ar gyfer Coleg Brenhinol Cerdd a Drama Cymru ers y cwrs i ddechrau yn 2011.

Gyda dim ond pum mlynedd arall o fwynhad cyn i James gyrraedd carreg filltir enfawr o gyfansoddi ar gyfer y sioeau Nadolig yma yn Theatr Torch, mae Jack and the Beanstalk yn parhau i fod yn un o'i ffefrynnau.

Gellir gweld Jack and the Beanstalk yn Theatr Torch o ddydd Gwener 13 - Sul 29 Rhagfyr 2024 gyda pherfformiadau prynhawn a chyda’r hwyr. Pris tocyn: £23.50 | £19.50 Consesiynau| £75.00 Teulu. Perfformiad Amgylchedd Hamddenol ddydd Sadwrn 14 Rhagfyr am 2pm. Perfformiad BSL - Dydd Mawrth 17 Rhagfyr am 6pm.

I archebu eich tocynnau neu am ragor o wybodaeth, cysylltwch â'r Swyddfa Docynnau ar 01646 695267 neu cliciwch yma.