Val Ruloff, ein hadolygydd cymunedol sy’n ei tywys drwy hwyl a sbri sioe hydref Cwmni Theatr Torch, The Hound of the Baskervilles. Mae’n adolygiad arbennig ac mae’n argymell i bawb weld y ddrama wych hon. 

Darllenwch ei sylwadau isod ...

Chwerthin hollti bol!  

Llwyddiant ysgubol!

"Mad dogs and Englishmen go out in on the midday sun misty moors"- fel mae'r gân (bron) yn mynd!

Mae'r tri aelod o'r cast – detholiad o'r radd flaenaf – yn rhoi perfformiadau gwych a bythgofiadwy. Mae'n wledd go iawn, heb unrhyw wastraff – dim digon hyd yn oed i'w gymryd adref mewn bag i'r ci. Mae popeth a addawyd yn ystod ymarferion cychwynnol y sgript wedi'i gyflawni a rhagor, gyda pherfformiadau amryddawn ac aelodau'r cast yn ymgymryd â nifer o rolau – a hyd yn oed rhywfaint o addasiadau byrfyfyr i ychwanegu at yr anhrefn a'r hwyl. Mae dilyn yr holl gliwiau yn cadarnhau fy amheuon dyfnaf – mae tystiolaeth bendant bod Sherlock Holmes, Dr Watson a Sir Henry Baskerville – yn wir – yn mwynhau eu hunain yn aruthrol wrth iddyn nhw fentro drwy'r daith wallgof hon o anturiaethau!

Mae Gareth John Bale, Artist Cyswllt y Torch, yn chwarae rhan Sherlock Holmes yn ogystal â Mr Stapleton a Mrs Stapleton – sy’n brydferth, yn ddirgel ac yn hudolus; "Slasher" Seldon; Mr Barrymore – a mwy. Mae Rick Yale yn mwynhau ei gyflwyniad newydd a chyffrous i lwyfan y Torch, ac yn ymgymryd â rôl Syr Henry Baskerville a mwy – rôl sy’n datgelu llawer, rhaid dweud! Mae Jessica Dyas – ffefryn adnabyddus yn y Torch – yn ymgymryd â rôl Dr Watson yn frwdfrydig. Mae’r actorion yn rhyngweithio’n fywiog iawn â’i gilydd, ac yn arddangos amseriad comig a chydlyniad gwych, ynghyd â pherthynas hapus sy’n trosglwyddo’n heintus i’r gynulleidfa.

Mae'r her wedi'i gosod, a'r safon wedi'i chodi unwaith eto.

Mae Chelsey Gillard, Cyfarwyddwr Artistig y Torch, wedi datrys yr achos ac wedi llwyddo i greu llwyddiant ysgubol gyda'r addasiad hwn – gan Stephen Canny a John Nicholson – o stori glasurol Sir Arthur Conan Doyle, The Hound of the Baskervilles.

Cadwch i fyny â’r cyflymder, cadwch i fyny â churiad y carnau'n carlamu ar draws y rhooostiroedd!! Cadwch i fyny â'r sioe gyflym hon sy'n symud yn chwim, gyda sgript "gellwair"- os y gallwch!

Mae'r sgript yn dilyn stori boblogaidd The Hound of the Baskervilles yn ffyddlon – ac yn cynnig dehongliad comig a hynod ddoniol ohoni. Mae'r cast yn bachu ar eu llinellau a'r digwyddiadau, y cyffro, y cwympiadau, y gomedi ffisegol, y dirgelwch a'r hwyl wyllt gydag brwdfrydedd a llawenydd – ac yn mwynhau pob tamaid a phob eiliad o'r hwyl afreolus! Mae'r gomedi gorfforol a'r golygfeydd arbennig yn bleser pur! Mae Bethan Eleri, y Cyfarwyddwr Ymladd ac Agosatrwydd, yn haeddu cael ei henwi a'i chanmol yn arbennig yma!

Mae Kevin Jenkins, y dylunydd set a gwisgoedd, yn rhoi rhagor o ddanteithion gweledol i ni, gyda chefndiroedd sy'n portreadu harddwch gwyllt ac awyrgylch unigryw Dartmoor. Mae'r gwisgoedd yn adlewyrchu cyfnod Edwardaidd yn berffaith ac yn dod â'r cymeriadau eiconig yn fyw.

Mae James Williams wedi cyfansoddi cerddoriaeth sy'n cyfleu thema Sherlock Holmes yn berffaith, gyda sain y ffidil ac offerynnau llinynnol yn creu trac sain hynod awyrgylchol. Mae'r effeithiau arbennig a'r propiau yn rhagorol – yn llawn syndod, yn ddyfeisgar ac yn llawn dychymyg. Maent yn amrywio o swigod a niwl yn chwyrlïo, i drapddorau sy'n trawsnewid yn gorsydd peryglus o dywod symudol. Mae'r golygfeydd yn wych ac yn hynod ddifyr hefyd – o anturiaethau brawychus am hanner nos i olygfeydd sawna llawn awyrgylch mentrus, a drama ar fwrdd trên cyflym sy'n rhuthro yn ei flaen.

Peidied â bod unrhyw gamddealltwriaethau clasurol fan hyn – Hound of the Baskervilles hwn yw’r gorau o’r gorau... enillydd heb ei ail!

Llun: Media to Motion