Mae Bar, Bee, a Q ar eu ffordd! Bydd The Three Little Pigs: The Musical yn ymweld â Theatr Torch ddydd Mercher 29 a dydd Iau 30 Hydref am sioe gerdd hwyliog, gynnes yn llawn caneuon, chwerthin, a Blaidd Mawr Drwg. A’r Blaidd Mawr Drwg y cafodd Anwen o'r tîm marchnata yma yn y Torch sgwrs ag ef ...

Dyweda ychydig wrthym am dy gymeriad

Rwy'n chwarae rhan y Blaidd Mawr Drwg, y dihiryn enwog rydyn ni i gyd yn ei adnabod am 'hwffian, pwffian a chwythu'ch tŷ i lawr'. Mae fy nghymeriad yn treulio hyd y stori yn ceisio dod o hyd i'r tri mochyn bach a'u dal i'w llyncu i de, gan wynebu llawer o rwystrau ar hyd y ffordd, a chael ei drechu gan y moch ar sawl achlysur.

Beth yw'r peth gorau am y sioe?

Y deinameg rhwng y tri mochyn bach yw calon llwyr y sioe. Gan ddathlu cwlwm teuluol rhwng tri mochyn gwahanol iawn sydd â phob un ei bersonoliaeth unigol ei hun, mae eu cemeg ar y llwyfan yn hynod heintus ac yn llawen i'w wylio. Uchafbwynt arall yw'r pyped trawiadol iawn a ddefnyddir ar gyfer y Blaidd a wnaed gan Little Angel Theatre. Wedi'i weithredu gan ddau berson, mae ei faint a'i fanylion yn hudolus i'w gwylio ar y llwyfan.

Disgrifia’r Blaidd mewn tair gair

Anrhagweladwy, direidus a gwallgof.

A fydd y sioe yn ein gwneud ni'n chwerthin?

Bydd y sioe yn sicr o wneud i bawb chwerthin. Mae jôcs y bydd plant ac oedolion yn eu mwynhau (mae'r Blaidd yn ddigywilydd iawn ac yn dwlu ar rolyn sosej Greggs). Byddwch yn barod am anhrefn gwirion a fydd yn gwneud i'r plant chwerthin, ac ambell i jôc y bydd rhieni'n cael hwyl ag ef.

Faint o bypedau sydd yn y sioe?

Gyda’i gilydd mae tri phyped yn y sioe. Y prif nodwedd yw'r Blaidd Mawr Drwg. Ond mae'r Twit a'r Twoo annwyl iawn yn ymddangos yn y sioe fel cantorion cefndir y Blaidd Mawr Drwg, dau aderyn ciwt a siriol iawn sy'n ychwanegu cyffyrddiad hwyliog at ganeuon y Blaidd. Cyfarwyddwr y Sioe, Matt Forbes, hefyd yw Cyfarwyddwr Pypedau'r sioe gerdd Lion King, ac mae’n gweithio fel Cyfarwyddwr Cyswllt ar War Horse, sy'n cynnwys pypedwaith helaeth. Felly disgwyliwch lawer o driciau hwyliog ac amrywiaeth o ran defnyddio'r pypedau.

A allwn ni ddisgwyl canu a dawnsio? Os felly, beth yw eich hoff ganeuon a symudiadau?

Sioe gerdd yw hon a ysgrifennwyd gan y cyfansoddwyr enwog Stiles a Drewe a gallwch chi ddisgwyl canu a dawnsio. Mae'r caneuon yn gyfoes iawn ac yn hynod o ddeniadol, cymaint felly nes i mi feddwl y bydd y rhieni'n hwmio'r alawon yn fwy na'r plant. Yr hyn sy'n gwneud y sgôr mor drawiadol yw ei bod hi'n anodd dewis ffefryn, a byddwch chi'n gweld bod gan bawb ffefryn gwahanol. Ond mae'n rhaid i fy un i fod yn 'One, two, three Little Pigs', mae'n ddeniadol iawn ac yn eich cyflwyno i fyd y sioe a chymeriadau'r moch. A lle mae cân yn cael ei chanu gan y moch, bydd symudiad neu ddau yn sicr (gall y moch hyn ddawnsio). Mae'r defnydd o bropiau hefyd yn codi'r coreograffi gan ychwanegu rhagor o hwyl at yr achlysur (megis ysgubellau a phentyrrau trawiadol iawn o frics).

Beth ydych chi wedi'i gyflwyno i'ch cymeriad i'w wneud yn wahanol?

Roeddwn i am wneud y Blaidd Mawr Drwg yn hwyl ac yn chwareus. Roeddwn i'n bendant eisiau ei wneud yn gymeriad y byddai cynulleidfaoedd wrth eu bodd yn ei gasáu. Roeddwn i'n ymwybodol y byddai llawer o blant yn ei wylio felly rydw i wedi archwilio dod o hyd i'r cydbwysedd hwnnw rhwng bod yn ddihiryn, ond eto'n ddoniol ac yn hoffus. A gobeithio bod hynny wedi talu ar ei ganfed. I edrych ar byped y Blaidd, mae'n edrych yn ddigywilydd ac yn ifanc iawn felly rydw i wedi ceisio sianelu hynny i'r cymeriad. Rydw i wedi dweud wrth lawer - dychmygwch Jim Carrey yn 'The Mask' ynghyd â Del Boy o 'Only Fools and Horses' ac ychwanegwch awgrym o or-actio. Mae'n anhrefn hwyliog, anrhagweladwy.

A fydd diweddglo hapus?

Gadewch i ni ddweud bod y sioe gerdd yn aros yn driw iawn i'r stori wreiddiol. Mae’r da bob amser yn gorchfygu drwg. Ond y daith i hynny fydd yn gwneud i chi chwerthin yn uchel ac yn gwneud i'r rhai bach rhyfeddu a bod ar fin eu seddi.

A fydd y Tri Mochyn Bach yn llwyddo i uno i drechu'r Blaidd Mawr Drwg? Mae digon mwy o droeon annisgwyl yn y stori gerddorol hynod gyrliog hon yn Theatr Torch ddydd Mercher 29 Hydref am 4.30pm a dydd Iau 30 Hydref am 11.30am a 3pm. Pris £16.00. £14.00 Plentyn a £55 Teulu. Ewch i'r wefan am ragor o fanylion www.torchtheatre.co.uk / ffoniwch y Swyddfa Docynnau ar (01646) 695267 neu gliciwch yma.