Dim ond tri mis sydd ‘na cyn pantomeim Nadolig Theatr Torch, sef Puss in Boots (gyda thema’r Gorllewin Gwyllt), ac mae Puss ei hun eisoes yn ceisio dal ei chynffon wrth iddi grwydro o gwmpas Sir Benfro yn chwilio am ei hesgidiau pinc llachar. Fe’u gwelwyd ddiwethaf yng Nghastell Penfro ond mae’n ymddangos bod ganddyn nhw feddwl eu hunain ac maen nhw wedi mynd am dro.

Mae Puss yn gwneud apêl daer i bobl Sir Benfro ymuno â hi yn ei hantur ddifyr o nawr tan fis Rhagfyr, wedi'r cyfan, gwnaed ei hesgidiau ar gyfer cerdded a rhaid i'r pantomeim fynd ymlaen!

“Fyddwch chi byth yn credu hyn, gan fy mod i fel arfer yn berffaith ym mhob ffordd, ond rydw i wedi colli fy hoff bâr o fŵts pinc eto ac mae angen eich help chi arna i i ddod o hyd iddyn nhw. Rydw i wedi chwilio ym mhobman o gwmpas Theatr Torch, o’r Caffi i Oriel Joanna Field, ond dydyn nhw ddim i’w gweld yn unman!,” meddai’r Puss hyfryd.

“Allwch chi fy helpu i ddod o hyd i’m bŵts? Efallai y byddaf yn dynn ar eich sodlau wrth i’m hesgidiau symud o leoliad i leoliad ar draws y sir – o Gastell Penfro i Grymych ac o Hwlffordd i Solfach, rhaid eu dychwelyd yn ddiogel fel y gall y pantomeim, rydw i wedi rhoi fy nghalon a’m gwadn iddo, fynd ymlaen! Peidiwch â throedio’n oflaus, dewch i gynnig pawen,” ychwanegodd Puss gyda gwên fach.

Gwelwyd yr esgidiau ddiwethaf yng Nghastell Penfro lle aeth ymwelwyr y filltir ychwanegol i ddod o hyd i'r esgidiau o'r Neuadd Normanaidd i'r Cwch Gwenyn a Thŵr Harri'r VII, ac fel yr eglura Lizzy Huge, Cyfryngau Cymdeithasol a Marchnata yng Nghastell Penfro, roedd yn antur wych i bawb. 

“Roedd yn wych croesawu’r bŵts pinc ar daith gyda Theatr Torch! Roedden ni wrth ein bodd yn cymryd rhan ac allwn ni ddim ag aros i weld eu cynhyrchiad o Puss in Boots!”

Bydd y rhai sy’n ddigon lwcus i ddod o hyd i’r bŵts yn ennill dau docyn ar gyfer noson agoriadol y pantomeim ar ddydd Sadwrn 5 Rhagfyr.

Gellir gweld Puss in Boots yn Theatr Torch o ddydd Sadwrn 5 Rhagfyr i ddydd Sadwrn 2 Ionawr. Perfformiad Amgylchedd Hamddenol: 19 Rhagfyr am 2pm. Perfformiad Dehongli Iaith Arwyddion Prydain: dydd Mawrth 22 Rhagfyr am 6pm. Archebwch eich tocynnau trwy'r wefan yn torchtheatre.co.uk / Swyddfa Docynnau: 01646 695267.