Yn dilyn llwyddiant ysgubol Kill Thy Neighbour (cyd-gynhyrchiad proffesiynol â Theatr Clwyd) a'r rhyfeddol Private Lives, bydd Theatr Torch yn croesawu cast serol i'w llwyfan yr hydref hwn yn The Turn Of The Screw. Bydd yr actor proffesiynol lleol Samuel Freeman a Seren Vickers o Benarth yn eich tywys trwy'r ddrama gyffro gythryblus a chyflym, a fydd yn gwneud i’ch calon guro’n galed a’ch cadw ar ymyl eich sedd.

Ganwyd a magwyd yr actor/cerddor Samuel yn Aberdaugleddau lle mynychodd Theatr Ieuenctid y Torch, a mynd ymlaen i hyfforddi yn Ysgol Gerdd a Chelfyddydau Perfformio Bath Spa. Dyma fydd ei chweched cynhyrchiad yn Theatr Torch yn dilyn Of Mice and Men, Beauty and the Beast, Jack and the Beanstalk, Cinderella a Sleeping Beauty.

Yn ymuno â Samuel ar y llwyfan bydd Seren Vickers, graddedig o Goleg Brenhinol Cerdd a Drama Cymru. Mae ei chredydau theatr yn cynnwys Jordan Baker yn The Great Gatsby (Theatr Clwyd); Llewellyn yn HENRY V (Storyhouse Theatre); Lady Macbeth (The Barbican Theatre, Plymouth) a Gwen yn Hail Cremation (National Theatre Wales). 

Mae Seren wrth ei bodd yn gwireddu ei huchelgais o weithio yn Theatr Torch.

Dywedodd: “Rwy’n gyffrous iawn i gamu i mewn i neuaddau cysgodol Bly i rannu stori arswyd a dychymyg Henry James gyda chynulleidfaoedd yr hydref hwn.”

Yn enwog am ei chynyrchiadau cartref rhagorol gan gynnwys y gwobrwyedig Grav, mae Theatr Torch yn cynnwys actorion proffesiynol lleol a'r dalent theatrig orau o bob cwr o Gymru, a bydd ei chynhyrchiad yn yr Hydref yn ticio'r blychau i gyd. Bydd y stori ysbryd glasurol, yn llawn dwyster seicolegol, ffraethineb a dirgelwch, a ysgrifennwyd yn wreiddiol gan Henry James ym 1898, yn gadael cynulleidfaoedd yn cwestiynu realiti, ac yn meddwl beth sy'n gredadwy a beth sydd ddim.

Dywedodd y Cyfarwyddwr Artistig, Chelsey Gillard: “Mae’r fersiwn hon o The Turn of the Screw yn gyfle i’r ddau actor gwych hyn ddangos eu sgiliau a rhoi perfformiadau meistrolgar. Rwyf wrth fy modd yn gweithio gyda Sam ac mae wedi bod yn freuddwyd i mi weithio gyda Seren ers tua deng mlynedd – felly alla i ddim aros i ddechrau ymarferion yn fuan. Cadwch lygad allan am gipolwg y tu ôl i’r llenni dros yr ychydig wythnosau nesaf.”

Bydd The Turn of the Screw yn ymddangos ar lwyfan Theatr Torch am gyfnod o dair wythnos o ddydd Mercher 8 Hydref i ddydd Sadwrn 25 Hydref. Tocynnau: £18-£28. Iaith Arwyddion Prydain: Dydd Mawrth 14 Hydref. Archebwch docynnau drwy'r wefan torchtheatre.co.uk / Swyddfa Docynnau: 01646 695267.