O seiclops i forgathod duon lliwgar â dau ben a dolffiniaid brawychus â dannedd a thentaclau, derbyniodd cystadleuaeth ‘Dylunio Creadur Môr Drygionus’ Theatr Torch dros 300 o geisiadau! Roedd yr holl ddyluniadau’n wych, ond ‘Aquantis’ a ddyluniwyd gan Freyja o Ysgol Gatholig Sant Ffransis a ddaliodd sylw’r beirniaid a bydd yn cael ei gynnwys ym mhantomeim Nadoligaidd y Torch, Rapunzel fis Rhagfyr.

Mae Freyja, sy'n ddeg oed, wrth ei bodd i gael ei henwi'n enillydd y gystadleuaeth ac y bydd ei dyluniad yn dod yn fyw ar lwyfan Theatr Torch y Nadolig hwn. 

“Roedd yn newyddion da iawn i’w gael. Mae lluniadu ac ysgrifennu creadigol yn rhywbeth rwy’n ei fwynhau ac mae gennyf ddiddordeb mawr ynddynt, felly roedd cael y cyfle hwn ac ennill yn anhygoel. Hoffwn ddweud da iawn i bawb arall a gymerodd ran, roedd yn gystadleuaeth hwyl i fod yn rhan ohoni.”

Ond beth yw'r Aquantis a sut mae Freyja yn ei phortreadu?

“Ar un adeg roedd hi’n afanc fach gyda chalon fawr. Mae ganddi bwerau arbennig ac mae’n saethu peli gwnj a all barlysu ei dioddefwyr ac yn ystod y cyfnod parlysu maen nhw’n gwbl dan reolaeth Aquantis. Mae hi’n nofio’n llawen trwy ddyfnderoedd hudolus y môr gyda chariad at archwilio pob cornel o’r cefnfor.”

Mae gan Freyja ddychymyg gwych ac mae hi'n treulio oriau yn bod yn greadigol. Mwynhaodd hefyd gael Theatr Torch i ymweld â'i hysgol gan gynnig gweithdai creadigol mewn cydweithrediad â Chymdeithas Gelfyddydau Gorllewin Cymru.

“Daeth fy syniad ar gyfer yr Aquantis trwy fy nychymyg, un a ddaeth yn fyw yn weledol ar ôl ystyried pa stori gefndirol roeddwn i eisiau ei chreu. Ni allaf ddweud fy mod i wedi gweld angenfilod môr yn agos ond rydw i wedi bod yn snorceli yn y Môr Coch yn ddiweddar felly helpodd hynny i roi mantais i’r Aquantis. 

“Mae’n anrhydedd mawr i mi gael fy newis ac alla i ddim aros i weld y cyfan yn dod at ei gilydd ac yn dod yn fyw. Diolch eto am y cyfle hwn.”

Ar gyfer eu prosiect yn 2025, i annog talent creadigol ifanc, cefnogodd cynrychiolwyr Cymdeithas Celfyddydau Gorllewin Cymru weithwyr proffesiynol Theatr Torch mewn gweithdai undydd mewn tair ysgol gynradd yn Aberdaugleddau. Y nod oedd cael y plant i ddychmygu, dylunio ac yn olaf greu model o anghenfil môr brawychus ar gyfer y pantomeim. Yn ystod y gweithdai hyn, braf oedd gweld ymgysylltiad, a brwdfrydedd amlwg y plant. Gallwch weld eu dyluniadau lliwgar ymhlith yr holl geisiadau cystadleuaeth yn Oriel y Torch, lle maent yn cael eu harddangos ar hyn o bryd.

Creodd y dyluniadau gymaint o argraff ar Gyfarwyddwr Artistig Theatr Torch, Chelsey Gillard, nes iddi ddewis rhai dyluniadau mwy cyfeillgar a fydd hefyd yn ymddangos yn Rapunzel. Bydd aelodau o Theatr Ieuenctid Theatr Torch yn lleisio'r creaduriaid hyn.

Bydd Rapunzel yn ymddangos ar lwyfan Theatr Torch o ddydd Sadwrn 06 Rhagfyr i ddydd Sul 28 Rhagfyr. Pris: £24.50 | £20.00 Gostyngiadau | £78.00 Perfformiad Teuluol mewn Amgylchedd Hamddenol - dydd Sadwrn 13 Rhagfyr am 2pm. Perfformiad Dehongli Iaith Arwyddion Prydain (Liz May) - ddydd Mawrth 16 Rhagfyr 6pm. Cliciwch yma am docynnau.