Mae Belle wedi cael gwahoddiad i'r ddawns a does ganddi hi ddim byd i'w wisgo! Mae pantomeim Nadoligaidd Theatr y Torch eleni yn stori mor hen ag amser gyda thro yn y gynffon; Beauty and the Beast. Mae’r Bwystfil wedi gwahodd yr hyfryd Belle  i’r Ddawns, ac mae angen ffrog hudolus ar gyfer Tywysoges, ond mae cwpwrdd y castell yn wag. Mae Theatr y Torch, Aberdaugleddau, yn galw ar ddylunwyr ifanc a dylunwyr ffasiwn ar draws Sir Benfro a gorllewin Cymru i helpu! 

Mae’r Torch yn cynnal cystadleuaeth o’r enw ‘Dylunio Gwisg ar gyfer Belle’ lle gall unrhyw un rhwng pump a 18 oed ddylunio ffrog Belle ar gyfer y ddawns. Bydd y cais buddugol yn cael ei wneud yn wisg go iawn ac yn cael ei gwisgo gan Belle yn y panto eleni ac fel yr eglura Kevin Jenkins, dylunydd set a gwisgoedd y cynhyrchiad, mae hwn yn gyfle gwych.  

“Mae dyfodiad Belle i ddawns y Bwystfil yn un o’r eiliadau mwyaf hudolus yn ein pantomeim! Dyma'r tro cyntaf i'r gynulleidfa ei gweld fel tywysoges hardd. Yn yr amrantiad hwn wrth iddi gerdded i lawr y grisiau mawreddog dylai'r gynulleidfa gael eu syfrdanu a gwenu. Hoffwn i bawb (ar y llwyfan ac yn y gynulleidfa) syrthio mewn cariad â Belle!” 

Mae Kevin yn annog pob cystadleuydd i fynd yn greadigol tu hwnt gyda'u dyluniadau. 

Ychwanegodd: “Mae yna fersiwn adnabyddus o ffrog ddawns Belle, sydd wedi’i lliwio’n felyn, ond dydyn ni ddim wedi penderfynu pa liw ddylai’r ffrog fod eto – chi sydd i benderfynu. Hoffwn gael fy synnu a rhyfeddu gan y lliwiau, siapiau a gweadau gwreiddiol y credwch y dylai Belle fod yn eu gwisgo. Yr unig derfyn yw eich dychymyg!” 

Mae Tim Howe, Uwch Reolwr Ieuenctid a Chymuned yn y Torch yn edrych ymlaen yn fawr at weld yr holl gynigion. 

Dywedodd: “Hoffai’r tîm creadigol yma yn y Torch weld pa ddyluniadau gwych y gall pobl ifanc hyd at 18 oed eu cynnig a bydd un enillydd lwcus yn gweld eu dyluniad yn cael ei drawsnewid yn wisg Belle ar y llwyfan i bawb ei gweld – mae mor gyffrous a hudolus ac am gyfle arbennig ydyw i’r enillydd.” 

Bydd Beauty and the Beast yn cael ei pherfformio yn Theatr y Torch rhwng 15 Rhagfyr a dydd Sul 31 Rhagfyr. Prisiau tocyn: £22.50 / £19.00 consesiynau a £70 ar gyfer tocyn Teulu. 

Os hoffech ragor o wybodaeth am y gystadleuaeth cysylltwch â'n Uwch Reolwr: Ieuenctid a Chymuned, Tim Howe – tim@torchtheatre.co.uk / 01646 694192.